පොලිසිය බල්ලට ගිහින්ද....

පසුගිය දින කීපයේ ඉතාමත් කාර්ය බහුලව සිටි හෙයින් බ්ලොග් එක තිබේද නැද්ද කියාවත් සොයා බලන්නටත් හැයාවක් ලැබුනේ නෑ.

විශේෂයෙන්ම කිව යුතු දෙයක් තිබේ.. නිසදැස්, කවි වලට මා විසින් කමෙන්ට් කරන්නේ නැත...සමහර කවි වල අර්ථයන් තේරුම් ගැනීමට පවා අපහසුය. එහෙයින් කවි වලට කමෙන්ට් කිරීමට නොලැබීම පිලිමද මාගේ කණගාටුව ප්‍රකාශ කර සිටිමි. 

--------------------------------------------------------------------------------------

පසුගිය සෙනසුරාදා සහ ඉරිදා දින දෙකේම හවස තුනේ සිට හය දක්වා කාර්යාලයේ තිබු සම්මන්ත්‍රණයකට සහභාගී විමට නියම වී තිබුණි. පසුගිය ඉරිදාට යෙදී තිබුනු ඉතාමත් වැදගත් වැදගත් කටයුත්තක් ඊළග සතියට කල් දැමීමට පවා සිදු වුයේ මෙම සම්මන්ත්‍රණය නිසාය. ඒ සුදු මැණිකේ ඇතුව පවුලේ සියලුම දෙනා සිංහල අලුත් අවුරුද්දට (අවුරුදු නම් ඉවරයිනේ දැන්) මාගේ නිවසට පැමිණීමය. කෙසේ හෝ එම කටයුත්ත ලබන ඉරිදා දිනට කල් දැමීමට සිදුවිය..

මේ කියන්නට යන්නේ ඒ කිසිවක් ගැන නොවේ. පසුගිය සෙනසුරාදා සිදුවු, මා ඉතා ප්‍රීතියටත් දුකටත් පත් කරන ලද සිදු වීමක් ගැනයි.. ඔන්න එහෙනම් කතාව.

වෙලාව හරියට හැන්දෑවේ හතට ඉතාම ආසන්න්නයි. මා මිනුවන්ගොඩ බස් නැවතුමේ කුරුණෑගල බස් නවතන තැනට වී බලා සිටියේ ගෙදර යාමට බසයක් එන තුරුය. ඒ වන විට දවසේ ගමන නිම කරමින් මිනුවන්ගොඩ - කොලඹ බසයක් බෝ ගහ යට නවත්න ලදී. ඉක්මනින් බසයෙන් බසින මිනිසුන් අතර පොලිස් නිළධාරියෙක් බෑගයක් සහ කුඩයක් අතැතිව බසයෙන් බසිනු මා බලා සිටියේ දින කීපයක පෙර කටුණායකදී සිදු වූ පොලිසියට පහරදීමේ සිදුවීමද සිහිපත් කරමිනි.

බසයෙන් බැස ගත් පොලිස් නිළධාරියා බස් නැවතුම ඉදිරියෙන් ලංකා බැංකුව දෙසට ගමන් කරමින් සිටියේය. ඒ අසලම තිබෙන හෝටලයක් ඉදිරිපිට සිටි තරුණයන් හතර පස් දෙනෙක් පොලිස් නිළධරියා ඔවුන්ව පසු කර යනවාත් සමගම එක විටම හූ කියන්නට පටන් ගත්හ. පොලිස් නිළධාරියා කිසිම සද්දයක් නැතිව බිම බලාගෙන ඉතා අසරණ කමින් ඉදිරියටම ගියේ ඔහුට වෙන කරන්නට කිසිවක් නොතිබු හෙයිනි. පොලිස් නිළධරියා නොපෙනී යන තුරුම හූ හඩ නවත්වන්නට තරුණයන් උත්සාහ නොගත්න.

මේ සිදුවීම මගේ හිතටත් සතුටක් ගෙන දුන්නා. ඒත් සමගම පොලිස් නිළධාරියා කෙරෙහි දුකක් අනුකම්පාවක් ඇති වුණා. ඒත් සමගම පැමිණි කුරුණෑගල බසයට නැගි මා නිවස බල පිටත් වුණා.